NA HABIBA ZARALI

VIJANA katika Wilaya ya Mkoani, wameshauriwa
kutokubali kutumiwa vibaya na wanasiasa katika kipindi hiki cha kuelekea
uchaguzi mkuu, na badala yake waendeleze kujenga umoja na ushirikiano.
Kauli hiyo ilitolewa na Mkuu wa wilaya hiyo, Issa Juma Ali, wakati
akizungumza na viongozi wa klabu za mpira jimbo la Mkoani,
katika hafla ya kukabidhi mipira na jezi kwa klabu za jimbo hilo zilizotolewa na Mwakilishi, Mmanga Mjengo Mjawiri.

Alisema kwa wakati huu vijana wanapaswa kupambana na kuumwa
na nchi yao kwa kuangalia mazuri wanayofanyiwa na kuacha kubabaishwa na wanasiasa.

“Katika kipindi hiki wanasiasa watakuwa na ushawishi mkubwa hasa kwa
vijana kama nyinyi na kutaka kuwalaghai ili kuhakikisha wanapata
mafanikio yao jambo ambalo huko mbele linaweza kuwagharimu kwa
maendeleo yenu,” alisema.

Alisema vijana wana ushawishi mkubwa kwa jamii, hivyo ni
lazima watumie fursa hiyo kuhakikisha wanakuwa mabalozi wazuri katika
kuendelea na kudumisha amani iliyopo.

Kwa upande wake, Mwenyekiti wa shirikisho la mpira wa miguu ZFF wilaya
ya Mkoani, Nassor Hakim Juma, alimpongeza mwakilishi wa jimbo la Mkoani kwa kuunga mkono juhudi za kuendeleza michezo.
“Katika wilaya yetu hii na jimbo letu hili la Mkoani lina madaraja
tofauti ya mpira wa miguu jambo ambalo kwetu ni faraja kubwa
kwani inawawezesha hasa vijana kupata ajira,” alisema.
Kwa upande wake, Diwani wadi ya Mkoani, Samir Juma Abdalla,
aliwahakikishia wanamichezo wa jimbo hilo kuwa wataendelea kuwapatia
huduma za michezo bila ya ubaguzi.

Alisema Chama Cha Mapinduzi kina ilani yake ambayo inaitekeleza sasa
haiwezi kwenda kinyume nayo na kitahakikisha watu wote wananufaika bila
ya ubaguzi.

Nao vijana hao walimpongeza mwakilishi kwa kuendeleza
masuala ya michezo katika jimbo hilo.

Hata hivyo, waliahidi kuvitumia vifaa hivyo kama ilivyokusudiwa na
kuyafanyia kazi maelekezo ya Mkuu wa wilaya kwa lengo la kuleta
mshikamano.
Jumla ya seti saba za jezi na mipira 31 yenye thamani 800,000, vilitolewa kwa klabu za mpira wa miguu jimbo la
Mkoani.