NEW YORK, MAREKANI

MWAKILISHI Nancy Pelosi amechaguliwa tena kuwa spika wa Baraza la Wawakilishi la Marekani kwa kipindi chake cha nne, akiwa na wingi uliopungua wa wawakilishi wa chama cha demokrat na changamoto zilizo mbele.

Mdemokrat huyo kutoka jimbo la California alipata kura zilizohitajika kupata ushindi,huku Wademokrat wawili wakipigia kura wagombea wengine na wengine watatu wakipiga kura ya kusema walikuwepo,(bila kuunga mkono wala kukataa).

Wademokrat wanashikilia wingi wa baraza la wawakilishi kwa idadi ndogo katika Baraza jipya la 117, wakiwemo wademokrat 222 na Warepublican wapatao 211.

Wawakilishi wengine wachache hawakuweza kupiga kura kwa sababu walikuwa wameambukizwa virusi vya korona na matatizo mengine ya kiafya.

Kwa mara ya kwanza tangu Mei, wabunge walipaswa kuwepo kwenye upigaji kura badala ya kutumia mfumo wa mtandao uliowekwa katikati ya janga hili.

Kura hiyo ilidumu kwa saa kadhaa wakati wabunge waliletwa ndani ya ukumbi katika vikundi vidogo vidogo ili kuepusha idadi kubwa ya wajumbe katika ukumbi.

Bunge jipya linakabiliwa na changamoto kadhaa, kati yake kulishinda janga la corona ambalo hadi sasa limegharimu maisha ya wamarekani zaidi ya 350,000, na kufufua uchumi wa nchi.

Pelosi mwenye umri wa miaka 80 alionyesha kuwa baada ya kipindi hiki cha miaka miwili hatogombea muhula mwengine kama spika wa Bunge, kulingana na makubaliano yaliyofanywa na Wanademokrat mnamo mwaka 2018 ambapo walimtaka asigombee uspika wakati huo.